Rusiye da'iriliri xamasni moskwagha teklip qildi

• 
  2006-02-09

Rusiye prézidénti wladimir putin, yéqinda pelestinde ötküzülgen parlamint saylimida ghelibe qilghan xamas herikitining rehberlirini moskwagha teklip qildi. Putin rusiyining gherb döletlirining eksiche, xamas herikitini isra'iliyige qarshiﮌ onlighan özini öltüriwélish xaraktérlik hujum élip barghan bir térrorluq teshkilat dep qarimaydighanliqini bildrüdi.

Amérika birleshme agéntliqining xewer qilishiche, xamas herikitining rehberliri prézidént putinning teklipini derhal qobul qilghan.

Ispaniyini ziyaret qiliwatqan rusiye prézidénti putin, ispaniye bash minstiri zapatiro bilen birlikte ötküzgen muxbirlarni kütiwélish yéghinidin kéyin bergen bayanatida, xamas herikiti démokratik we qanunluq bir saylam netijiside hakimiyet béshigha keldi. Biz pelestin xelqining iradisige hörmet qilishimiz kérek, dégen.

Xamas herikiti 25‏- yanwar küni pelestinde élip bérilghan parlamint saylimida ghelibe qilip, dunya jama'etchilikini heyran qaldurghan. Xamas herikitining nizamnamisida, heriketning meqsidi isra'iliyini yoqitish dep békitilgen bolup, gherb döletliri uzundin béri xamas herikitige nizamnamisidin mezkur ibarini chiqirwitishni telep qilip kelgen bolsimu, emma xamas hazirghiche bu teleplerni ret qilip kelmekte.

Bu arida, franisye agéntliqining xewer qilishiche, amérika hökümiti, rusiye hökümitini prézidént putinning xamas rehberlirini moskwagha teklip qilish meqsiti heqqide chüshenche bérishke chaqirghan. (Eqide)