Буш, дөләтләрни муһәммәд пәйғәмбәрниң рәсими сәвәбидин чиққан қаршилиқларни тосашқа чақирди

Америка президенти җорҗ W буш чаршәнбә күни һәр қайси дөләт һөкүмәтлирини, кишиләрниң муһәммәд пәйғәмбәрниң һәҗивий рәсимигә қарши елип барған зораванлиқ һәрикәтлирини тосушқа чақирди. Бу, бушниң мәзкур рәсим вәқәси һәққидә тунҗи қетим очуқ баянат бериши болуп һесаблиниду.

Буш сөзидә йәнә, һәр қайси дөләтләрни гунаһсиз дипломатларниң бихәтәрликини қоғдашқа чақирди. У, ахбарат әркинликини яқлаш билән биргә, " ахбарат әркинликиму болуш керәк һәмдә мәсулийәтму болуши керәк" деди. Буш бу сөзлирини иорданийә падишаһи ақ сарайға зиярәткә кәлгән мәзгилдә қилған.

Буниң алдида 3 чоң хәлқаралиқ тәшкилат болған бирләшкән дөләтләр тәшкилати, явропа иттипақи һәмдә ислам дөләтлири тәшкилати сәйшәнбә күни бирләшмә баянат елан қилип, дунядики мусулманларни өзини тутувелишқа чақирған. Баянатта, "гәрчә бу рәсим кишини наһайити әпсусландурсиму, лекин дуняниң нурғун җайлиридики мусулманларниң зораванлиқ йоли билән аччиқини чиқириши кишини әндишигә салиду" дәп йезилған.

Муһәммәд пәйғәмбәрниң һәҗивий рәсими өткән йили 9‏- айда дәсләп данийиниң гезитидә елан қилинған болуп, кейин бу явропадики бәзи гезитләрдиму қайта бесилған. Шу сәвәбтин ливан, иран вә сүрийә қатарлиқ дөләтләрдики нарази болған мусулманлар данийә әлчиханисиниң бинасини вәйран қилған.Һәтта шу сәвәбтин афғанистанда көтүрүлгән қалаймиқанчилиқта 4 киши қаза қилип 20 нәччә киши яриланған.(Пәридә)