Xitay amérika bilen herbiy alaqini kücheytishni xalaydighanliqini bildürdi

Xitay da'iriliri yéqinda xitayning amérika bilen herbiy alaqini kücheytishni xalaydighanliqini éytti. Emma ular yene amérikini teywen mesilisige arilashmasliqqa agahlandurdi.

Xitay dölet mudapi'e ministiri saw gu'angchüen seyshenbe küni amérika dölet mejlisi ezaliridin teshkillen'gen wekiller ömikining ziyaritini qobul qilghanda bu qarashlirini otturigha qoyghan. U xitay azadliq armiyisining amérika armiyisi bilen téximu zich hemkarliq we alaqe ornitishni xalaydighanliqini we shu arqiliq ikki döletning künsayin küchiyiwatqan siyasiy munasiwitini eks ettürüshni isteydighanliqini bildürdi.

Ikki dölet otturisidiki herbiy alaqe 2001‏- yili amérika déngiz armiye ayrupilani bilen bir xitay herbiy ayrupilanining soqushup kétish weqesidin kéyin üzülüp qalghan idi. Lékin yéqinqi ikki yildin buyan ikki terep herbiy alaqisida azraq yaxshilinish körüldi.

Washin'gton da'iriliri xitayni, herbiy tereqqiyatining bolupmu yadro bombilirini yasash jehettiki rushenlik derijisini téximu ashurushqa chaqirdi. Amérika hökümiti yene, herbiy alaqining ikki döletning diplomatik munasiwitidiki halqiliq amil ikenlikini tekitlep, amérikining xitay bilen birleshme herbiy meshq élip bérishni xalaydighanliqini bildürdi. Emma xitay terep özining bu riqabetchisi bilen birleshme herbiy pa'aliyet élip bérishtin éhtiyat qilip keldi. (Peride)