Xitay hökümiti amérikining herbiy xam chot toghrisidiki doklatini ret qildi

Xitay hökümiti seyshenbe küni bush hökümiti teripidin ötken hepte élan qilin'ghan amérika dölet bixeterlik istratégiyisi doklatidiki xitay kishilik hoquq xatirisining nacharliqi we xitay herbiy tereqqiyat ehwalining yiterlik ashkarilanmaywatqanliqigha da'ir mezmunlarni ret qildi.

Xitay terepning bayanati re'is xu jintaw kéler ayda amérikini ziyaret qilmaqchi boluwatqan bir mezgilge toghra kelmekte. Birleshme axbarat agéntliqining eskertishiche, xu jintaw ziyaret jeryanida prézidént jorji bushqa teywen mesilisi boyiche bésim ishlitishi mümkin.

Xitay tashqiy ishlar ministirliqi bayanatchisi chin gang shinxu'a axbarat agéntliqigha bergen bayanatida, prézidént bush teripidin ötken hepte élan qilin'ghan amérika bixeterlik istratégiyisi doklatini " junggoning ichki - tashqiy siyasitige asassiz we mes'uliyetsizlerche baha bérish, junggoning ichki ishlirigha arlishish" bilen eyiblidi.

Shinxu'a axbarat agéntliqining eskertishiche, xitay hökümiti resmiy qanallar arqiliq amérika hökümitige naraziliq bildürgen. Aq sarayning dölet bixeterlik istratégiyisi doklatida xitay da'irilirini " koniche usulda tepekkur qilish we heriket élip bérish" tin waz kéchishke chaqirghan we herbiy tereqqiyat qurulushini ashkarilashqa ündigen. Xitay hökümitining yéqinda bu yilqi herbiy xam chotni yene 14 % östürgenliki amérika we uning sherqiy asiyadiki ittipaqdashlirini bi'aram qilghan idi. (Erkin)