Musherref hindistanni ziyaret qildi

Hindistan bash ministiri manmoxan sing bilen pakistan prézidénti perwiz musherref yekshenbe küni yéngi déhlida uchriship, keshmir mesilisini öz ichige alghan keng témilarni muzakire qildi.

Ikki dölet rehberliri bu qétimqi söhbetni illiq we ehmiyetlik boldi dep teswirlidi. Amérika birleshme axbarat agéntliqining xewirige qarighanda, sing we musherref ikki sa'etche dawamlashqan söhbettin kiyin, ikki döletning düshmenlik weziyitige xatime béridighan tinchliq wastilirini ilgiri sürüshke qoshulghan.

Bu wastilar, soda alaqini we chégra qatnishini kücheytish, qismen herbiy eslihelerni chégridin keynige chékindürüsh qatarliqlarni öz ichige alidiken.

Bu qétimqi ziyaret, perwiz musherrefning 2001 - yilidiki ikki dölet rehberlirining uchrishishi meghlup bolghandin kéyinki hindistan'gha qilghan tünji ziyariti bolup hésablinidu. Üch yil awal, hindistan bilen pakistan keshmir mesilisi sewebidin chégrilirigha qoshup yötkep, toqunushush girdabigha kélip qalghan idi.

Perwiz musherrefning ziyariti jeryanida, ikki dölet rehberliri yene tünji qétim rayondiki térrorchiliqni tosush heqqide bir pikirge kelgen. Musherref paksitan térritoriyiside hindistan'gha qarshi térrorluq heriketlerge yol qoymaydighanliqini bildürgen.

Hindistan kontrolliqidiki keshmirde qarshiliq pa'aliyetlirini élip bériwatqan qoralliq küchlerning köpinchisi pakistanni baza qilghan bolup, ularning keshmirni musteqilliqqa érishtürüsh we yaki pakistan'gha qoshush yolida 15 yildin buyan élip barghan qarshiliq heriketliri bu rayonda 66 ming kishining ölüshini keltürüp chiqarghan idi. (Arzu)