Bush xu jintaw bilen kishilik hoqoq mesilisi heqqide söhbetleshti

Chilining paytexti santiyagoda ötküzülgen asiya-tinch okyan iqtisadiy hemkarliq teshkilatining bashliqlar yighini ikkinchi künige qedem qoydi. Yekshenbe künidiki yighinda mezkur teshkilatqa eza 21 döletning rehbiri asasliqi dunya soda teshkilatigha eza döletler arisidiki erkin sodini rawajlandurush mesilisini muzakire qildi.

Shenbe küni santiyagoda bashlan'ghan asiya-tinch okyan iqtisadiy hemkarliq teshkilatining bashliqlar yighini térrorchiliqqa qarshi turush, yadro qorallarni kontrol qilish we xelq'ara sodini rawajlandurush mesililirini muzakire témisi qilghan.

Amérika prézidénti jorj bush shenbe küni yene yighin'gha qatnashqan xitay dölet re'isi xu jintaw bilen uchriship, xitayning kishilik hoquq mesilisi heqqide toxtalghan.

Amérika awazi radi'osining xewirige qarighanda, amérika prézidénti jorj bush kishilik hoquq we diniy erkinlik mesilisining yenila xitay-amérika munasiwitidiki muhim mesile ikenlikini tekitligen.

Bush yene tibetning diniy dahiysi dalay lamani alahide tilgha élip, xitayning amérika bilen kishilik hoquq söhbitini eslige keltürüshke qoshulghanliqini qarshi alidighanliqini bildürgen.

Ikki dölet rehbiri söhbette yene teywen mesilisi, xitay xelq pulining tégishish qimmiti we shimaliy koriye yadro krizisi qatarliq mesililernimu muzakire qilghan. (Arzu)