Xitay dölet re'isi xu jintaw amérikida bush bilen uchrashmaqchi


2006.03.23

April éyida amérikini ziyaret qilidighan xitay dölet re'isi xu jintaw 20‏- april küni aq sarayda amérika prézidénti jurj bush bilen uchrishidiken.

Aq sarayning bayanatchisi skot makmilanning 22‏- mart küni muxbirlargha bildürüshiche, térrorchiliq, yadro qorallarning tarqilishining aldini élish hemde soda ikki dölet rehberlirining uchrishishining asasliq témilirini teshkilleydiken.

Xitay dölet re'isi xu jintaw ötken yili séntebir éyida amérikini ziyaret qilmaqchi idi. Emma amérikida yüz bergen katrina sel apti tüpeylidin bu ziyaretni kichiktürgen.

Xu jintawning amérika ziyariti harpisida amérika dölet mejlisi ezaliri, eger xitay hökümiti xitay pulining qimmitini kötürüshni qobul qilmisa, xitaygha qarshi iqtisadiy jaza yolgha qoyush üchün pa'aliyet élip barmaqta.

Amérika dölet mejlisining köpligen ezaliri hemde amérikidiki nurghunlighan karxanchilar, xitay hökümitining, amérika tawarlirining xitaygha kirishining aldini élish hemde xitay tawarlirini téximu köp miqdarda amérikigha éksport qilish üchün xitay pulining qimmitini meqsetlik halda töwen tutuwatqanliqini bayan qilmaqta.

Ularning éytishiche, xitay hökümitining mushu oyuni sewebidin amérikida milyonlighan kishi ishsiz qalghan hemde ikki dölet otturisidiki sodidiki tengpungsizliq ötken yili 202 milyard dollargha yetken. Yeni xitay amérikigha, amérikining xitaygha éksport qilghinidin 202 milyard dollar köp tawar éksport qilghan. (Qanat)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.