Xu jintaw bilen putin bir qatar kélishimler imzalidi

Xitay dölet re'isi xu jintaw bilen xitayni ziyaret qiliwatqan rusiye prézidénti wladimir putin seyshenbe küni béyjingda söhbet ötküzüp, "junggo - rusiye birleshme bayanati" qatarliq höjjetlerni öz ichige alghan 15 türlük kélishim imzalidi. Kélishim mezmuni siyasi, diplomatiye, énérgiye we pul - mu'amile sahelirige chétilghan.

Birleshme axbarat agéntliqining xewer qilishiche, rusiye prézidénti putin söhbettin kéyin muxbirlargha rusiyining sibiriye néfitini xitaygha toshuydighan sibiriye néfit turubisi 5 yil ichide qurulidighanliqini bildürgen. Rusiye prézidéntining tashqiy ishlar meslihetchisi sérgéy prixodkow, xitay - rusiye munasiwitini ikki dölet tarixidiki " eng yuqiri pellige kötirildi" dep teriplidi. Ikki terep xitay - rusiye tashqiy soda hejimini 2010 - yilghiche hazirqi 29 milyard dollardin bir qatlashni pilanlimaqta.

Xitay, rusiyining eng chong qoral - yaraq xéridari we amérikining sabiq sowét ittipaqi jumhuriyetliride démokratiyini omumlashturush pilanigha qarshi turush sépidiki ittipaqdishi. Putin béyjingda amérikini agahlandurup, " démokratiyini mejburiy éksport qilish, medeniyet ölchimi we qimmitini bashqilargha téngish" toqunushlargha sewebchi bolidighanliqini bildürdi. Xitay tashqiy ishlar bayanatchisi chin gang, xitay - rusiye munaswitining kélechiki keng we parlaq " dep tekitligen.

Amérika hökümiti ötken hepte élan qilghan tashqiy siyaset doklatida, rusiyining démokratiye islahatini qayrip qoyghanliqidin wehime qiliwatqanliqini tilgha élip, xitayni kishilik we siyasiy erkinlikni ret qilish bilen eyibligen idi. (Erkin)