Президент буш хитай рәиси ху җинтав билән өткүзидиған сөһбәт темилири һәққидә тохталди


2006.03.31

Америка президенти җорҗи буш, 4 - айниң 18 - күнидин 22 - күнигичә америкини зиярәт қилидиған хитай дөләт рәиси ху җинтав билән сода, әқлий мүлк һоқуқиға һөрмәт қилиш, сиясий вә диний әркинлик, тибәт мәсилиси, хитай базирини ечиветиш қатарлиқ мәсилиләр бойичә сөзлишидиғанлиқини билдүрди.

Ху җинтав 20 - април күни ақ сарайда президент буш билән учришиду. Президент буш йеқинда вашингтондики әркинлик сарийида сөз қилип, ху җинтавға содида адил болуш, әқлий мүлк һоқуқиға һөрмәт мәсилисини тәкитләймән, деди. Шуниң билән биргә у, хитайни сиясий вә диний әркинликни техиму кәң қойивитишкә чақиридиғанлиқини вә ху җинтавниң" әркин базардин қорқмиғанға охшаш әркин җәмийәттинму қорқмаслиқини үмид қилимиз " дәп көрсәтти.

Президент бушниң әскәртишичә, у ху җинтав билән тибәт роһани даһиси далай лама вә рим ватиканиниң хитайдики католик муритлиридин әнсирәватқанлиқи қатарлиқ мәсилиләр бойичә сөзлишидикән. Буш, сода, иқтисад мәсилисидә хитай рәһбиригә бесим ишлитидиғанлиқини билдүрди. У, бейҗиң даирилирини хитай йеза игилик базирини вә хитай мулазимәт базирини ечиветишкә үндәйдиғанлиқини тәкитлигән. У, " биз җуңгониң америка санаәт мәһсулатлириға адил муамилә қилишини күтимиз. Биз һөкүмәтниң санаәт карханилириға қошумчә ярдәм пули беришини адил риқабәт билән тәминлигәнлик, дәп қаримаймиз " дәйду. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.