Xu jintaw bilen putin, ottura asiyada bixeterlik hemkarliqi élip baridighanliqini jakarlidi

Xitay dölet re'isi xu jintaw bilen rusiye prézidénti wladimir putin jüme küni moskwada uchriship, ottura asiyada bixeterlik hemkarliqini shundaqla iqtisadi alaqini kücheytishke qoshuldi.

Waldimir putin, muxbirlarni kütüwélish yighinida ikki dölet otturisidiki siyasi ixtilaplarning asasen hel bolghanliqini bildürgen. U, " biz herbiy alaqimiz shundaqla dölet mudapi'e hemkarliqimizni kücheytishke hewes qilimiz," dep körsetti. Xu jintaw, ikki döletning bixeterlik sahesdiki pilanini tilgha aldi. U," xelq'araliq we rayon xaraktérlik muhim mesililerdiki bolupmu ottura asiyaning muqimliqi, shangxey hemkarliq teshkilati, b d t islahati we koriye yérim arilidiki yadro mesilisidiki maslishishchanliqimiz we hemkarliqimiz kücheymekte," dédi. U, " teywen we chéchiniye qatarliq achquchluq mesililerdiki öz ara hemkarliqimizni kücheytimiz," dep eskertti.

Ikki dölet rehbiri shu küni qoshma axbarat élan qilip, " igilik hoquqluq döletlerge chettin kirgen ijtima'iy we siyasi shekillerni téngish qobul qilinmaydu," dep jakarlidi.

Közetküchilerning tekitlishiche, ikki dölet qoshma axbaratidiki " kishilik hoquqni qoghdash xizmitini bashqilarning ichki ishlirigha arlishish asasida élip bérishke bolmaydu," dégen ibariler amérikigha qaritilghanken.

Sibiriye - daching néfit turuba pilani xu jintawning ziyaret küntertipidiki muhim mesililerning biri. Uning nowosibirsktiki ziyariti sibiriye- daching néfit rurubisigha alaqidarken. (Erkin)