Xitay dölet re'isi xu jintaw kanada bash walisi bilen söhbet ötküzdi

Xitay dölet re'isi xu jintaw kanadani ziyaret qiliwatqan bir chaghda xelq'ara kechürüm teshkilati, kanada emgek ittipaqi, tibetler, falun'gong we kanada Uyghur jem'iyiti qatarliq teshkilat we organlar ottawada axbarat élan qilish yighini ötküzüp, kanada bash ministiri pa'ul martindin xu jintawgha kishilik hoquq mesililiri boyiche bésim ishlitishni telep qildi.

Xelq'ara kechürüm teshkilatining bayanatchisi, "hazir kanadaning kishilik hoquq mesilisidiki meydanini qet'iy ipadilesh zamani keldi" dep tekitligen.

Axbarat élan qilish yighini kanada dölet mejlisi binasida ötküzülgen. Yighinda kanada Uyghur jem'iyitining wekili muhemmet toxti, kanada hökümitidin xitay dölet re'isi xu jintawgha kanadada yashawatqan Uyghurlarning memlikettiki a'ile tawabatlirigha ziyankeshlik qilish, qorqutushni toxtitish we a'ile tawabatliri bilen jem bolushigha yol qoyush toghrisida bésim ishlitishini telep qildi.

Kanada bash ministiri xu jintaw bilen uchrishishning aldida muxbirlarni kütüwélip, men iqtisad bilen kishilik hoquq otturisida sodilashmaymen, dep tekitligen. U, xu jintaw bilen uchrashqanda kishilik hoquq mesilisini otturigha qoyudighanliqini shundaqla bu mesile söhbet témisining bash küntertibini igileydighanliqini bildürgen.

Pa'ul martin bilen xu jintaw, bügün söhbet ötküzdi. Xu jintawni peyshenbe küni kanada bash walisi murasim ötküzüp kütüwalghan. (Erkin)