Xu jintaw amérika bilen bolghan sürkülüshni azaytish heqqide wede berdi

• 
  2005-09-14

Amérika prézidénti jorj bush we xitay dölet re'isi xu jintaw seyshenbe küni nyoyorkta körüshti. Amérika birleshme axbarat agéntliqining xewirige qarighanda, bir sa'etche dawamlashqan söhbette ikki dölet rehbiri shimaliy koriyini yadrosizlandurush mesiliside hemkarliqni kücheytidighanliqini bildürdi.

Xu jintaw uchrishishtin kéyin bergen bayanatida, jorj bushqa amérika bilen bolghan soda sürkülüshlirini azaytidighanliqi heqqide wede berdi. Amérika, xitay bilen bolghan soda tetür balanisining barghanséri éship kétiwatqanliqidin qattiq endishe qilmaqta idi.

Xu jintaw, amérikidin import qilidighan mallarni köpeytish heqqide ünümlük tedbir alidighanliqini bildürdi. Emma u shuning bilen bir waqitta, prézidént jorj bushtin teywenning musteqilliqige qarshi turushqa chaqirdi.

Biraq, jorj bush bayanatida teywen mesilisini tilgha almidi. Kéyinrek, amérika aq saray dölet bixeterlik kéngishining mes'ul emeldari mayik girün, washin'gtonning teywen musteqilliqini qollimaydighanliqini izahlidi.

Girünning bildürishiche, prézidént bush xu jintaw bilen bolghan uchrushishida yene xitayning kishilik hoquq mesilisini otturigha qoyghan. Bush xu jintawgha kishilik hoquqqa munasiwetlik bir qisim dilolarning tizimlikini tapshurup, ularning weziyitidin endishe qiliwatqanliqini bildürgen.

Xewerge qarighanda, jorj bush we xu jintaw söhbet ötküzgen nyoyorktiki méhmanxanining sirtida, bir terepte teywen musteqilchiliri, falün'gungchilar, tibetler xu jintawgha qarshi namayish ötküzgen, yene bir terepte bir qisim xitay muhajirlirini uni qarshi alghan bolup, meydan intayin qalaymiqan bolghan.

Bu arida, amérika aq saray emeldarliri, prézidént jorj bushning xu jintawning teklipi boyiche, bu yil noyabirning otturiliri xitayni ziyaret qilmaqchi bolghanliqini élan qildi. (Arzu)