Ху җинтав әнглийидә тоний билейр билән учрашти

Әнглийидә зиярәттә болуватқан хитай дөләт рәиси ху җинтав чаршәнбә күни әнглийә баш министири тоний блейр билән көрүшүп, икки дөләтниң сода алақиси, хәлқара террорчилиққа қарши туруш, кишилик һоқуқ вә һава келиматиниң өзгириши қатарлиқ темиларда сөһбәтләшти.

Улар йәнә сөһбәт җәрянида 1 милярд 300 милйон америка доллири қиммитидә сода келишими түзди. Бу мәзгилдә тибәт вә фалунгоң паалийәтчилири әнглийә баш министири бинасиниң алдида байрақ вә лозонкиларни көтүрүп, шуарларни товлашқан һалда намайиш өткүзди.

Тоний блейрниң баянатчисиниң мәлум қилишичә, икки рәһбәр оттурисидики сөһбәт асаслиқи икки дөләт содиси, һава-келиматиниң өзгириши, хәлқара бихәтәрлик, намратчилиқни йоқитиш вә көчмәнләр мәсилиси қатарлиқ темиларға мәркәзләшкән. Тоний блейр ху җинтавға йәнә, хитайдики кишилик һоқуқ вәзийити һәққидиму сөз ачқан.

Өткән һәптә хитай ташқи ишлар министири ли җавшиң, явропа бирликиниң хитайға қорал сетип бәрмәслик чәклимисиниң, соғақ урушниң мәһсули икәнликини тәкитлигән иди. Анализчилар бу қетим ху җинтавниң әнглийигә бу чәклимини бикар қилиш һәққидә сөз ечиши мумкинликини көрсәтмәктә.

Шундақла ху җинтав сәйшәнбә күни әнглийә аял падишаһи елизабет ии оюштурған зияпәткә қатнашқан чеғида, хитайниң чоқум демократийини яхшилайдиғанлиқини һәмдә хитай тәрәққиятиниң әнглийә вә башқа дөләтләр үчүн қош һосуллуқ һәмкарлиқ пурсәтлирини яритип беридиғанлиқини билдүргән. (Пәридә)