Xu jintaw en'gliyide toniy biléyr bilen uchrashti

En'gliyide ziyarette boluwatqan xitay dölet re'isi xu jintaw charshenbe küni en'gliye bash ministiri toniy bléyr bilen körüshüp, ikki döletning soda alaqisi, xelq'ara térrorchiliqqa qarshi turush, kishilik hoquq we hawa kélimatining özgirishi qatarliq témilarda söhbetleshti.

Ular yene söhbet jeryanida 1 milyard 300 milyon amérika dolliri qimmitide soda kélishimi tüzdi. Bu mezgilde tibet we falun'gong pa'aliyetchiliri en'gliye bash ministiri binasining aldida bayraq we lozonkilarni kötürüp, shu'arlarni towlashqan halda namayish ötküzdi.

Toniy bléyrning bayanatchisining melum qilishiche, ikki rehber otturisidiki söhbet asasliqi ikki dölet sodisi, hawa-kélimatining özgirishi, xelq'ara bixeterlik, namratchiliqni yoqitish we köchmenler mesilisi qatarliq témilargha merkezleshken. Toniy bléyr xu jintawgha yene, xitaydiki kishilik hoquq weziyiti heqqidimu söz achqan.

Ötken hepte xitay tashqi ishlar ministiri li jawshing, yawropa birlikining xitaygha qoral sétip bermeslik cheklimisining, soghaq urushning mehsuli ikenlikini tekitligen idi. Analizchilar bu qétim xu jintawning en'gliyige bu cheklimini bikar qilish heqqide söz échishi mumkinlikini körsetmekte.

Shundaqla xu jintaw seyshenbe küni en'gliye ayal padishahi élizabét i'i oyushturghan ziyapetke qatnashqan chéghida, xitayning choqum démokratiyini yaxshilaydighanliqini hemde xitay tereqqiyatining en'gliye we bashqa döletler üchün qosh hosulluq hemkarliq pursetlirini yaritip béridighanliqini bildürgen. (Peride)