Xu jintaw ispaniyidiki ziyaritini bashlidi

Gérmaniyidiki ziyaritini axirlashturghan xitay dölet re'isi xu jintaw yekshenbe küni ispaniyige yétip keldi.

Xu jintaw ispaniyidiki ikki dölet munasiwitini yaxshilash meqsitide élip barghan ikki künlük ziyaritide, ispaniye padishahi xu'an karlos we bash ministir xoséy zapatérolar bilen körüshmekchi.

Amérika birleshme agéntliqining xewirige qarighanda, bu xu jintawning xitay dölet re'islikige teyinlen'gendin buyanqi ispaniyige qilghan tunji ziyariti bolup, u bu qétim ispaniye bilen soda, pen-téxnika we medeniyet saheliride bir yürüsh hemkarliq kélishimlirini tüzidiken.

Ispaniye, xu jintawning bu qétimliq yawropa sepirining axirqi békiti bolup, u yawropadiki ziyariti jeryanida arqa-arqidin türlük qarshiliq namayishlirigha duch keldi. U barghanliki dölette xelq'ara kechürüm teshkilati, tibet, Uyghur we falun'gong pa'aliyetchiliri namayish pa'aliyetlirini élip bardi.

Xu jintaw gérmaniyidiki mezgilidimu, dunya Uyghur qurultiyining yétekchiligide 100 din oshuq Uyghur bérlinda, tibet, mongghol we falun'gongchilar bilen birlikte namayish ötküzüp xitay hökümitining kishilik hoquq weziyitini eyiblidi.

Shundaqla shenbe küni kechte, kishilik hoquq pa'aliyetchiliri ispaniyining paytexti madritta yighilip namayish qilghan hemde ular yene düshenbe küni xitayning ispaniyidiki bash elchixanisi aldida qarshiliq namayishi ötküzüshni pilanlimaqta. (Peride)