Xu jintaw ispaniyide kishilik hoquq teshkilatlirining naraziliq herikitige duch keldi

• 
  2005-11-15

Xitay dölet re'isi xu jintaw yawropa sepirining axirqi békiti ispaniyide, xelq'ara kechürüm teshkilati, tibet herikitini himaye qilghuchilar we falun'gong muritlirining naraziliq herikitige duch keldi.

Xu jintaw seyshenbe küni ispaniye paytexti madrid shehiride ispaniye bash ministiri zapatéro bilen jonggo - ispaniye soda sana'etchiler yighinining échilish murasimigha qatnashqanda, yighin meydanining sirtida kishilik hoquq pa'aliyetchiliri, tibet teshkilatliri we falun'gong muritliri bolup 50 dek kishi yighilish ötküzüp, xu jintawgha naraziliq bildürdi.

Naraziliq bildürgüchiler bilen birge, xu jintawning texminen birer yüzdek qollighuchisimu yighilish ötküzgen. Emma xu jintawni tenqid qilghuchilar, qollighuchilarni xitay elchixanisi pul bérip yighip kelgen, dep eyiblimekte.

Xu jintawning ispaniye ziyariti seyshenbe küni axirlashti. U, ziyaret jeryanida ispaniye bash ministiri bilen söhbet ötküzüp, ikki döletning istratégiyilik shiriklik munasiwiti ornatqanliqini jakarlighan. Ular yene jinayetchilerni öz- ara ötküzüp bérish we ötküzüwélish kélishimi imzalidi. Emma ispaniye kishilik hoquq mesilisi qatarliq seweblerdin ölüm jazasigha höküm qilinish éhtimalliqi bolghan shexslerni ötküzüp bermeslik hoquqini saqlap qalidiken.

Xu jintaw ispaniyidiki ziyaritini axirlashturghandin kéyin, jenubiy koriyige qarap yürüp ketti. U, bu yerde asiya - tinch okyan iqtisadiy hemkarliq teshkilatining bashliqlaryighinigha qatnishidu. (Erkin)