Xu jintaw amérikini ziyaret qilishqa bashlidi


2006.04.18
Share on WhatsApp
Share on WhatsApp

Xitay dölet re'isi xu jintaw seyshenbe küni amérikining siyatil shehirige yétip kélip bu dölettiki 4 künlik ziyaritining bir qisimi bolghan yumshaq détal shirkitining xojayini bil gaytis bilen körüshti we bo'én shirkitini közdin köchüridighan tunji türini bashlidi.

Xu jintawning ayrupilani siyatil shehirining 48 kilométir sirtidiki péynfild aydurumigha qon'ghandin kéyin, shu jaydiki béyjingperes xitay muhajirlirining qarshi élishigha érishti. Lékin shuning bilen birge falun'gong muritliri, teywen musteqilliqini qollighuchilar we tibet sergerdan hökümitining xu jintawgha qarshi namayish ötküzmeslik toghrisidiki iltimasigha buysunmighan tibetlikler we tibet herikitini qollighuchilarning naraziliq namayishigha duch keldi.

Uning ziyariti amérika puqralirida, soda- sana'et sahesi we siyaset munbiride xitayning buningdin kéyin qandaq dölet bolidighanliqigha qarita gumanlar küchiyiwatqan bir mezgilge toghra kelmekte. Xu jintaw prézidént bush bilen peyshenbe küni aq sarayda uchrishidu. Lékin bush uninggha dölet ziyapiti bermesliki mumkin.

Birleshme axbarat agéntliqining eskertishiche, bush bilen xu jintawning söhbiti xelq pulining qimmiti, soda, eqliy mülük hoquqi, néfit - énérgiye bixeterliki , iran, shimaliy koriye, tibet mesilisi, kishilik hoquq we diniy erkinlik mesililirige chétilishi mumkin. Lékin xitay da'iriliri teywen mesilisining béyjing üchün xitay - amérika otturisidiki eng muhim mesile hésablinidighanliqini bildürmekte.

Xu jintaw washin'gton'gha qedem qoyghanda u bu yerdiki Uyghurlar, teywenlikler we falun'gongning namayishigha duch kélishi mumkin. Xelq'ara kechürüm teshkilati seyshenbe küni élan qilghan bayanatida, prézidént bushtin, xu jintawni béyjing olimpik tenterbiye yighini mezgilide kishilik hoquq islahati élip bérishqa qistashni telep qildi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.