Ху җинтав келәр һәптидә русийини зиярәт қилмақчи


2007-03-19
Share

Дүшәнбә күни русийә даирилири, хитай президенти ху җинтавниң келәр һәптә русийини зиярәт қилидиғанлиқини билдүрди.

Русийә президент ишханиси ахбарат бөлүминиң билдүрүшичә, хитай президенти ху җинтав 26‏- март күнидин 28‏- күнигичә давамлишидиған зиярити җәрянида русийә президенти владимиз путин билән көрүшүп, русийидә хитай йили паалийәтлириниң һәмдә бир хитай көргәзмисиниң ечилиш мурасимиға қатнишидикән.

Русийә президенти владимир путин өткән йили хитайни зиярәт қилип, шаңхәйдә өткүзүлгән, шаңхәй һәмкарлиқ тәшкилати дөләт башлиқлириниң алий дәриҗилик йиғиниға қатнашқан иди.

Гәрчә, йеқинқи йиллардин бери хитай билән русийә оттурисидики мунасивәтләр һәр тәрәплимә тәрәққий қиливатқан болуп, икки дөләт хәлқара мәсилиләрдә охшаш мәйданда туруп бир-бирини қоллап-қуввәтләватқан болсиму, әмма сиясий мулаһизичиләр русийә вә хитай оттурисида нурғун ихтилаплар мәвҗут икәнликини һәмдә кәлгүсидә болупму оттура асия районида иқтсадий, сиясий вә енергийә саһәсидә әң көп җидәл вә риқабәтлишишниң бу икки дөләт оттурисида йүз беридиғанлиқини билдүрмәктә.

Һәтта бәзи мулаһизичиләр, ахириқи күнләрдә, болупму русийиниң шәрқий районида хитайларға қарита башланған һуҗумларни вә хитайда русийилик саяһәтчиләрниң өлтүрүлүшини, русийә билән хитай оттурисида йүз бәргүси җидәл вә риқабәтләрниң башлиниш алдида турғанлиқиниң бишарити дәп қаримақта. (Қанат)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт