Xu jintaw kéler heptide rusiyini ziyaret qilmaqchi

Düshenbe küni rusiye da'iriliri, xitay prézidénti xu jintawning kéler hepte rusiyini ziyaret qilidighanliqini bildürdi.

Rusiye prézidént ishxanisi axbarat bölümining bildürüshiche, xitay prézidénti xu jintaw 26‏- mart künidin 28‏- künigiche dawamlishidighan ziyariti jeryanida rusiye prézidénti wladimiz putin bilen körüshüp, rusiyide xitay yili pa'aliyetlirining hemde bir xitay körgezmisining échilish murasimigha qatnishidiken.

Rusiye prézidénti wladimir putin ötken yili xitayni ziyaret qilip, shangxeyde ötküzülgen, shangxey hemkarliq teshkilati dölet bashliqlirining aliy derijilik yighinigha qatnashqan idi.

Gerche, yéqinqi yillardin béri xitay bilen rusiye otturisidiki munasiwetler her tereplime tereqqiy qiliwatqan bolup, ikki dölet xelq'ara mesililerde oxshash meydanda turup bir-birini qollap-quwwetlewatqan bolsimu, emma siyasiy mulahizichiler rusiye we xitay otturisida nurghun ixtilaplar mewjut ikenlikini hemde kelgüside bolupmu ottura asiya rayonida iqtsadiy, siyasiy we énérgiye saheside eng köp jidel we riqabetlishishning bu ikki dölet otturisida yüz béridighanliqini bildürmekte.

Hetta bezi mulahizichiler, axiriqi künlerde, bolupmu rusiyining sherqiy rayonida xitaylargha qarita bashlan'ghan hujumlarni we xitayda rusiyilik sayahetchilerning öltürülüshini, rusiye bilen xitay otturisida yüz bergüsi jidel we riqabetlerning bashlinish aldida turghanliqining bishariti dep qarimaqta. (Qanat)