Хитай дөләт рәиси ху җинтав әнгилийидики зияритини башлиди

Хитай дөләт рәиси ху җинтав сәйшәнбә күни кишилик һоқуқ тәшкилатлири, тибәт һәрикитиниң қоллиғучилири вә аз бир қисим уйғурларниң наразилиқ һәрикәтлири астида әнгилийидики зияритини башлиди.

Франсийә ахбарат агентлиқиниң хәвәр қилишичә, ху җинтав зиярәт җәрянида әнгилийә даирилири билән сода, йәр шари бихәтәрлики вә келимат өзгириши қатарлиқ мәсилиләр бойичә сөһбәт елип баридикән.

Ху җинтав лондонға йетип кәлгәндин кейин, ханиш илзабит ии ниң буккиңхам сарийиға барғичә тибәт азатлиқи, диний әркинлик вә демократийини тәләп қилған 600 дин артуқ намайишчиниң күч көрситиш һәрикитигә дуч кәлди. Ху җинтав буниңдин икки ай илгири бейҗиңда әнгилийә баш министири тоний блайир билән учрашқан иди.

Ху җинтавниң бу дөләттики зиярити икки күн давамлишиду. Блайирниң ашкарилишичә, униң ху җинтав билән чаршәнбә күни өткүзидиған рәсмий сөһбити сода, йәр шари бихәтәрлики вә келимат өзгириши, шуниң билән биргә " хитайниң иқтисадий вә сиясий тәрәққиятини қандақ илгири сүрүш" қатарлиқ мәсилиләргә четилидикән.

Әнгилийә баш министириниң баянатчиси, кишилик һоқуқ мәсилисиниң бурунқиға охшашла оттуриға қоюлидиғанлиқини билдүрди. Тоний блайир, ху җинтав лондонға келишниң алдида , хитай рәһбиригә қарши намайиш өткүзүш чәкләнмәйдиғанлиқини елан қилған. Хитайниң сабиқ дөләт рәиси җяң зимин, 1999 - йили әнгилийини зиярәт қилғанда әнгилийигә һөкүмити намайишчиларниң һәрикитини чәклигән иди. (Әркин)