Xitay dölet re'isi xu jintaw en'giliyidiki ziyaritini bashlidi

Xitay dölet re'isi xu jintaw seyshenbe küni kishilik hoquq teshkilatliri, tibet herikitining qollighuchiliri we az bir qisim Uyghurlarning naraziliq heriketliri astida en'giliyidiki ziyaritini bashlidi.

Fransiye axbarat agéntliqining xewer qilishiche, xu jintaw ziyaret jeryanida en'giliye da'iriliri bilen soda, yer shari bixeterliki we kélimat özgirishi qatarliq mesililer boyiche söhbet élip baridiken.

Xu jintaw london'gha yétip kelgendin kéyin, xanish ilzabit i'i ning bukkingxam sariyigha barghiche tibet azatliqi, diniy erkinlik we démokratiyini telep qilghan 600 din artuq namayishchining küch körsitish herikitige duch keldi. Xu jintaw buningdin ikki ay ilgiri béyjingda en'giliye bash ministiri toniy blayir bilen uchrashqan idi.

Xu jintawning bu dölettiki ziyariti ikki kün dawamlishidu. Blayirning ashkarilishiche, uning xu jintaw bilen charshenbe küni ötküzidighan resmiy söhbiti soda, yer shari bixeterliki we kélimat özgirishi, shuning bilen birge " xitayning iqtisadiy we siyasiy tereqqiyatini qandaq ilgiri sürüsh" qatarliq mesililerge chétilidiken.

En'giliye bash ministirining bayanatchisi, kishilik hoquq mesilisining burunqigha oxshashla otturigha qoyulidighanliqini bildürdi. Toniy blayir, xu jintaw london'gha kélishning aldida , xitay rehbirige qarshi namayish ötküzüsh cheklenmeydighanliqini élan qilghan. Xitayning sabiq dölet re'isi jyang zimin, 1999 - yili en'giliyini ziyaret qilghanda en'giliyige hökümiti namayishchilarning herikitini chekligen idi. (Erkin)