Чәтәлдики хитай демократлири ху җинтав үстидин әрз сунди

Хитай дөләт рәиси ху җинтав америка президенти җорҗ буш билән көрүшүшиниң һарписида, америкидики хитай демократлиридин ваң дән вә ваң җүнтав, ху җинтав үстидин америкидики бир сот мәһкимисигә әрз сунди.

Хәвәрдә ейтилишичә, 4 - ийон тйәнәнмин оқуғучилар һәрикитиниң рәһбәрлириниң бири ваң дән вә демократик зат ваң җүнтав, ху җинтавни зиянкәшлик қилиш вә төһмәт қилиш җинайити билән әйибләп,8 - сентәбир күни вашингтондики йәрлик сотқа әрз сунған.

Улар әрзидә, бейҗиң һөкүмитиниң өзлирини тәйвәнниң ишпийони дәп сөз- чөчәк тарқатқанлиқи һәмдә паспортлирини узартип беришни рәт қилип, юртиға қайтишқа йол қоймиғанлиқини әйиблигән.

Бейҗиң һөкүмити техи бу һәқтә һечқандақ ипадә билдүрмиди. Һалбуки, ху җинтав 9 - айниң 14 - күнидин 16 - күнигичә нйойоркта өткүзилидиған б д т башлиқлар йиғинида америка президенти җорҗ буш билән көрүшиду.

Ху җинтав нөвәттә миксикини зиярәт қиливатқан болуп, буниң алдида у канадада болған. У шәнбә күни канадани зиярәт қилған мәзгилдә, уйғурлар, тибәтләр , йәрлик фалүнгуң муритлири вә тәйвән мустәқилчилири ху җинтавға қарши кәң көләмлик наразилиқ намайиши өткүзгән иди. (Арзу)