Chet'eldiki xitay démokratliri xu jintaw üstidin erz sundi

Xitay dölet re'isi xu jintaw amérika prézidénti jorj bush bilen körüshüshining harpisida, amérikidiki xitay démokratliridin wang den we wang jüntaw, xu jintaw üstidin amérikidiki bir sot mehkimisige erz sundi.

Xewerde éytilishiche, 4 - iyon tyen'enmin oqughuchilar herikitining rehberlirining biri wang den we démokratik zat wang jüntaw, xu jintawni ziyankeshlik qilish we töhmet qilish jinayiti bilen eyiblep,8 - séntebir küni washin'gtondiki yerlik sotqa erz sun'ghan.

Ular erzide, béyjing hökümitining özlirini teywenning ishpiyoni dep söz- chöchek tarqatqanliqi hemde pasportlirini uzartip bérishni ret qilip, yurtigha qaytishqa yol qoymighanliqini eyibligen.

Béyjing hökümiti téxi bu heqte héchqandaq ipade bildürmidi. Halbuki, xu jintaw 9 - ayning 14 - künidin 16 - künigiche nyoyorkta ötküzilidighan b d t bashliqlar yighinida amérika prézidénti jorj bush bilen körüshidu.

Xu jintaw nöwette miksikini ziyaret qiliwatqan bolup, buning aldida u kanadada bolghan. U shenbe küni kanadani ziyaret qilghan mezgilde, Uyghurlar, tibetler , yerlik falün'gung muritliri we teywen musteqilchiliri xu jintawgha qarshi keng kölemlik naraziliq namayishi ötküzgen idi. (Arzu)