Ху җинтав японийә баш министири койзуми билән көрүшүшкә шәрт қойди

Хитай дөләт рәиси ху җинтав җүмә күни японийиниң сабиқ баш министири рютаро хашимото билән көрүшкәндә, әгәр японийә баш министири койзуми ясикону бузрукгаһини зиярәт қилишни тохтатса, униң билән көрүшүшкә мақул болидиғанлиқини билдүргән.

Ройтерс ахбарат агентлиқиниң хәвәр қилишичә, ху җинтав хашимотоға " җуңго - японийә оттурисида достанә вә һәмкарлашқучи қошнидарчилиқ мунасивәтни раваҗландуруш икки дөләтниң түп- мәнпәәтигә уйғун " дәп тәкитләш билән биргә, " әгәр японийә рәһбири A дәриҗилик уруш җинайәтчилири дәпнә қилинған ясикону бузрукгаһини зиярәт қилишни тохтатса, мән җуңго - японийә мунасивитини күчәйтиш вә японийә рәһбири билән сөһбәт өткүзүшкә тәйярмән " дәп сөзлигән.

Нөвәттики хитай - японийә мунасивити, токю билән бейҗиң 1974 - йили дипломатик мунасивәт орнатқандин бериқи әң төвән сәвийигә чүшүп қалди, хитай һөкүмити буниң сәвәбини японийә рәһбәрлириниң ясикону бузрукгаһини зиярәт қилғанлиқи, дәп чүшәндүрмәктә. ясикону бузрукгаһиға 2 - дуня урушида хитайға қарши уруш қозғиған вә йирақ шәрқ уруш җинайәтчиләр коллигийисидә сотланған японийә һәрбий қоманданлири дәпнә қилинған иди. Лекин японийә баш министири койзуми хитайниң әйиблишини рәт қилмақта.

Койзуминиң әскәртишичә, униң ясиконуни зиярәт қилиштики мәқсиди бу йәрдики уруш қурбаниға айланған бигунаһ пуқраларниң роһиға дуа оқуш вә урушниң тәкрар йүз бәрмәслики үчүн тарихий савақни әстә тутуш, икән. Хашимото җүмә күни ху җинтав билән учрашқанда " японийә билән җуңго сияси вә җамаәт пикири җәһәттә қийинчилиққа дуч кәлмәктә " дәйду. (Әркин)