Хәлқара кәчүрүм тәшкилати канадани, мәһсус вәкил евәтип хитай түрмисидики пуқрасини қутулдурушқа чақирди

Пәйшәнбә күни хәлқара кәчүрүм тәшкилати канада һөкүмитини, алаһидә вәкил тәйинләп хитай түрмисидә йетиватқан канада пуқраси һүсәйин җелилни қутулдуруп чиқишқа үндиди. Хәлқара кәчүрүм тәшкилатиниң канада ишханисиниң баш катипи Alex Neve, " оттаваниң һүсәйин җелилни қутулдуруп чиқишта һәмкарлишидиған алаһидә әлчи әвәтиши бәк муһим" дегән.

Мухбирларни күтивелиш йиғинида Alex Neveмундақ дегән: "алаһидә әлчи болса, тәҗрибилик, ишәнчилик вә хитайниң ичкий қисмида алақиси бар болған, хитай билән бу һәқтә сөһбәт елип берип йол ачалайдиған адәм болуши керәк".

Өткән һәптә хитай һөкүмити һүсәйин җелилни бөлгүнчилик вә террорлуқ җинайәтлири билән әйибләп муддәтсиз қамақ җазаси бәргән иди.

Канада ташқи ишлар министири Peter Mckay өткән һәптә елан қилған баянатида һөкүмгә йиқиндин көңүл болидиғанлиқини ипадиләп: "һүсәйин җелил хитайда тутуп турулуш җәрянида харланған, бәлким қийин-қистаққа елинған болушиму мумкин" дәп бейҗиңни, бирләшкән дөләтләр тәшкилати "тән җазасиға қарши туруш"келишмигә еғир дәриҗидә хилаплиқ қилди дәп әйиблигән.

27 ‏- Април франсийә агентлиқи бәргән хәвәрдә қәйт қилинишчә, һүсәйин җелил 2001- йили канада пуқралиқиға өткән болуп, хитай қануниға асасән һүсәйин җелилниң хитайниң пуқралиқ салаһийити, у канада пуқраси болған минутлардин башлапла инавәттин қалидикән. (Җүмә)