Amérika hökümitining xitay toqumichiliq mallirigha cheklime qoyush erzini qubul qilghanliqi, xitayning naraziliqini qozghidi

Xitay hökümiti peyshenbe küni bayanat élan qilip, amérika hökümitining " bazarni qalaymiqanlashturush tehdidi" bilen xitayning toqumichiliq mehsulatlirini import qilishqa cheklime qoyush heqqidiki erzni qubul qilghanliqigha qattiq naraziliq bildürdi.

Amérika hökümitining qarmiqidiki toqumichiliq mehsulatliri kilishimini ijra qilish komititi charshenbe küni amérika toqumichiliq sana'iti teshkilatining xitay mallirigha cheklime qoyush heqqidiki erzini resmiy qubul qilghan idi.

Amérika toqumichiliq sana'iti teshkilati, xitay mallirining amérika toqumichiliq sahesige éghir tesir körsitishining aldini élish üchün, amérika hökümitidin ishtan, köynek, paxta kirlik qatarliq on türlük xitay mallirini import qilishni toxtutushni telep qilghan. Mezkür teshkilat yene, xitay mallirining soda üstünlikini igiliwélishidiki sewebni, xitay da'irilirining xelq pulining amérika dolliri bilen bolghan tégishish nisbitini qesten töwen tutqanliqtin kélip chiqiwatqanliqini körsetken.

Xitay soda ministirlikining bayanatchisi zungchüen buninggha qet'iy qarshi chiqip, "amérika hökümitining xitay mallirini cheklesh erzini qubul qilghanliqi dunya soda teshkilatining belgilimisige xilab " dep bildürgen.