Yawropa birliki xitaygha qaritilghan qoral imbargosini bikar qilmaydighanliqini éytti

Yawropa birliki charshenbe küni xitaygha, béyjing hökümiti kishilik hoquq xatiriside körünerlik ilgirilesh hasil qilmighiche qoral sétip bermeslik jazasini bikar qilmaydighanliqini bildürdi.

Amérika birleshme axbarat agéntliqining xewirige qarighanda, yawropa birlikining bayanatchisi frensoyz lébéyl, "biz xitaydiki kishilik hoquq we söz erkinliki qatarliq mesililerdin téxiche endishe qilimiz. Hemde biz xitayning xelq'araliq insan heqliri ölchimige boy sunishini ümid qilimiz" dédi.

Yawropa birliki rehberliri bilen xitay bash ministiri wén jyabaw bashchilighidiki wekiller ömiki charshenbe küni gollandiyide 2 künlük söhbitini bashlighan bolup, ikki terep otturisidiki söhbet qoral imbargo mesilisidin sirt yene, soda we meblegh sélish témilirighimu chétilidiken.

Xitay hökümiti yawropa birlikining qoral imbargosini bikar qilishigha izchil tiriship kelgen bolup, gérmaniye bilen fransiyimu buni yéqindin qollap, yawropa birlikini xitaygha bérilgen bu jazani bikar qilishqa köp qétim ündigen idi.

Emma amérika hökümiti buninggha izchil qarshi turup, eger yawropa birliki xitaygha qoral sétip berse, xitayning bu qorallarni teywen'ge taqabil turushqa ishlitishidin endishe qilip keldi. Hetta amérika bu heqte yawropa birlikini agahlandurup, nawada yawropa birliki xitaygha qaratqan qoral imbargosini bikar qilsa, u halda amérikining yawropa birlikige sezgür herbiy téxnikilirini bermeydighanliqini eskertken idi. (Peride)