Amérika dölet mejlisi yawrupa ittipaqigha soda cheklimisi qoyushi mumkin

Amérika dölet mejlisining bildürüshiche, eger yawrupa ittipaqi xitaygha yürgüzüwatqan qoral sétip bermeslik cheklimisini bikar qilsa, amérika yawrupa ittipaqigha bir qisim soda cheklimisini qoyushi mumkin . Chünki amérika, xitaygha qaritilghan qoral cheklimisi bikar qilin'ghanda, xitayning herbiy qurulushining küchiyishidin endishe qilmaqta.

Fransiye axbarat agéntliqining shenbe küni bildürüshiche, amérika dölet mejlisi kéngesh palatasi tashqi munasiwetler komitétining re'isi richard lugér "méningche, qoral cheklimisi bikar qilin'ghanda, amérika nurghun yuqiri téxnikiliq mehsulatlirini yawrupa ittipaqigha sétip bermeydu. Amérika we yawrupa ittipaqi arisidiki soda munasiwette zor özgirish bolushi mumkin" dégen.

Amérika kéngesh palata ezasi jorj elin , amérikining asasliqi xitayning herbiy qurulushining teywen'ge tehdid yetküzishidin endishe qiliwatqanliqini bildürgen. Jorj ellinning körsitishiche, yene bir tereptin, xitaymu shimaliy koriyige oxshashla qoral tarqatquchi dölet iken.

Amérika yawrupa ittipaqining xitaygha qaratqan qoral cheklimisini bikar qilishigha qet'iy qarshi turiwatqan bolsimu, biraq yawrupa rehberliri bu yil 6 - ayda xitaygha yürgüziwatqan qoral cheklimisini bikar qilishi mumkinlikini bildürmekte.

Bu arida, xitay tashqi ishlar ministirliqining bayanatchisi li jawshing yekshenbe küni bayanat élan qilip, yawrupa birlikini xitaygha yürgüziwatqan qoral cheklimisini bikar qilishqa chaqirdi. U sözide" xitayning yawrupa birlikidin bahasi qimmet hemde kéreksiz bolghan qorallarni sétiwélishining hajiti yoq" - dep körsetti. (Arzu)