Yawropa ittipaqi wekilliri amérika bilen xitaygha bérilgen qoral cheklimisini muzakirileshti

Amérika tashqi ishlar ministirliqining melum qilishiche, yawropa ittipaqining bir wekiller ömiki yéqinda washin'gton'gha kélip, amérika hökümiti bilen xitaygha bérilgen qoral cheklimisini bikar qilish mesiliside söhbetleshken.

Gerche bu qétimliq söhbetning tepsilati we netijisi metbu'atlarda téxi élan qilinmighan bolsimu, emma amérika tashqi ishlar ministirliqi charshenbe küni xitay qurultiyining teywen'ge herbiy küch ishlitish idiyisi singgen "döletni parchilashqa qarshi qanuni" ni maqullishining, yawropa ittipaqini qayta oylandurishi mumkinlikini bildürdi.

Xitay metbu'atlirida, yawropa ittipaqi wekillirining washin'gtondiki mezkur sepirining asasliqi, yawropa ittipaqining xitaygha qaratqan qoral cheklimisini bikar qilishining, asiyaning herbiy tengpungliqigha tesir körsetmeydighanliqini we buningliq bilen amérika herbiy téxnikilirining xitaygha kirip ketmeydighanliqini amérikigha chüshendürüshni meqset qilghanliqi körsitilgen.

Amérika hökümiti we amérika dölet mejlisi birlikte ilgiri yawropa ittipaqini agahlandurup, eger yawropa ittipaqi xitaygha bérilgen qoral jazasini bikar qilsa, u chaghda amérikining buninggha qatnashqan yawropa döletlirige jaza qollinidighanliqini eskertken idi.

Xitay xelq qurultiyi düshenbe küni "döletni parchilashqa qarshi qanuni" ni maqullighandin kéyin, teywen tashqi ishlar ministirliqi bayanat élan qilip, xitay hökümitining kishilik hoquq weziyitini yaxshilap, démokratik tüzümni yolgha qoymighiche, yawropa ittipaqining xitaygha qaratqan qoral cheklimisini bikar qilmasliqini telep qildi. (Peride)