خىتايدىكى ئىنسانپەرۋەر زاتلار خىتايغا قارىتىلغان ئىمبارگونى بىكار قىلىش شەرتلىرىنى ئوتتۇرىغا قويدى


2005.03.23
Share on WhatsApp
Share on WhatsApp

خىتاينىڭ مەملىكەت ئىچى ۋە سىرتىدىكى كىشىلىك ھوقۇقنى ھىمايە قىلىدىغان ئىنسانپەرۋەر زاتلار، ياۋروپا ئىتتىپاقى رەھبەرلىرىگە ئوچۇق خەت ئېلان قىلىپ، خىتايغا قارىتىلغان قورال - ياراق ئىمبارگوسىنى بىكار قىلىشنىڭ ئۈچ ئالدىنقى شەرتىنى ئوتتۇرىغا قويدى.

" تيەن ئەنمىندىكى ئانىلار ھەرىكىتى" نىڭ 125 نەپەر ئەزاسى بىلەن، 4 - ئىيۇن ھەرىكىتىنىڭ رەھبەرلىرى شۇنداقلا 400 دىن ئارتۇق خىتاي دېموكراتىيە ھەرىكىتىنىڭ سەركەردىلىرى، چارشەنبە كۈنى ياۋروپا ئىتتىپاقىنىڭ رەھبەرلىرىگە يازغان ئوچۇق خەتكە ئىمزا قويغان. ئوچۇق خەت ئېلان قىلىش ھەرىكىتىنى " پۇقرالار ھوقۇقىنى قوغدىغۇچى پىدائىيلار" شۇنداقلا " جاۋ زىياڭنى دەپنە قىلىش كومىتېتى" قاتارلىق تەشكىلاتلار ئۇيۇشتۇردى. ئۇلار ئوچۇق خەتتە ياۋروپا ئىتتىپاقىنىڭ رەھبەرلىرىنى ئاگاھلاندۇرۇپ، " 1989 - يىلدىكى تيەن ئەنمىن ۋەقەسى جوڭگولۇقلار ئۈچۈن كونا دەۋرنىڭ شانلىق كالىندارى بولۇپ قالغىنى يوق، جوڭگونىڭ كىشىلىك ھوقۇق ۋەزىيىتىدە 1989 - يىلدىن بېرى ھېچقانداق ياخشىلىنىش بولۇپ باقمىدى،" دەپ تەكىتلىگەن.

ئۇلار، ياۋروپا ئىتتىپاقىنىڭ خىتاي ھۆكۈمىتى تۆۋەندىكى ئۈچ خىل شەرتنى ھازىرلىغان ئەھۋال ئاستىدا ئاندىن ئىمبارگونى بىكار قىلىشنى تەلەپ قىلغان. بۇ ئۈچ خىل شەرت " ۋىدان مەھبۇسلىرىنى قويۇپ بېرىش ياكى ئاشكارە سوت قىلىش" ، " 4 - ئىيۇن ۋەقەسىنى تەكشۈرۈش ۋە جاۋاپكارلارنى سۈرۈشتۈرۈش" ، " خەلقئارا پۇقرالار ھوقۇقى ۋە سىياسى ھوقۇق ئەھدىنامىسىنى ئىمزالاش ۋە ئۇنىڭغا ئەمەل قىلىش" قاتارلىقلارنى ئۆز ئىچىگە ئالىدىكەن. ياۋروپا ئىتتىپاقى 1989 - يىلدىكى تيەن ئەنمىن ۋەقەسىدىن كېيىن خىتايغا قورال - ياراق ئىمبارگوسى يۈرگۈزگەن. ياۋروپا ئىتتىپاقى يېقىندا ئىمبارگونى بىكار قىلىشنى ئويلىشىۋاتقانلىقىنى ئېلان قىلغان ئىدى. (ئەركىن)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.