Yawropa ittipaqi xitayni kishilik hoquq weziyitini yaxshilashqa chaqirdi


2005.05.11
Share on WhatsApp
Share on WhatsApp

Yawropa ittipaqi emeldari charshenbe küni, xitayning birleshken döletler teshkilatining puqralarning siyasiy hoquqini qoghdash shertnamisige qol qoyushi kéreklikini hemde xitay kishilik hoquq weziyitide ilgirlesh hasil qilsa, buning yawropa ittipaqining xitaygha qaratqan qoral cheklimisini bikar qilishigha paydiliq bolidighanliqini bildürdi.

Béyjingda ziyarette boliwatqan yawropa ittipaqining tashqi ishlar komissari bénita férréro-waldnér xanim xitay emeldarliri bilen körüshkende bu sözlerni qilghan bolup, u yene, " qoral cheklimisini bikar qilish üchün, biz yawropa parlaméntini, xitayning kishilik hoquq weziyitini yaxshilashta mustehkem qedem bésiwatqanliqini éytish bilen qayil qilishimiz kérek. Shunga xitay hökümitining buninggha yéqindin yardemde bolushi zörür" dédi.

Bénita xanim bashchilighidiki yawropa ittipaqi wekiller ömiki béyjingda, xitayning tashqi ishlar ministirini öz ichige alghan bir qisim aliy derijilik emeldarliri bilen uchriship, kishilik hoquq we qoral cheklimisi mesilisidin sirt yene, ikki qirghaq munasiwiti, "döletni parchilashqa qarshi qanun" we yawropa ittipaqining xitay toqumichiliq import mallirini tekshürüsh témiliridimu söhbetlishidiken.

Bénita xanim yene, xitayning yéngidin chiqarghan "döletni parchilashqa qarshi qanuni" ning yawropa ittipaqining 16 yildin béri xitaygha yürgüzüwatqan qoral satmasliq cheklimisini bikar qilishigha tosalghu boliwatqanliqini tekrarlidi. U yene, teywendiki öktichi partiye rehbiri song chuyüning xitaygha qilghan ziyaritini tilgha élip, xitay hökümitining teywendiki her qaysi terepler bilen hetta nöwettiki prézidént chén shüybyen bilenmu söhbetlishishi kéreklikini eskertti. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.