Yawropa ittipaqi: jonggogha qaritilghan qoral - yaraq imbargosi dawamlishidu

Gerche xitay bilen yawropa ittipaqi munasiwiti téz tereqqi qiliwatqan bolsimu, lékin yawropa ittipaqi jüme küni xitaygha qaritilghan qoral - yaraq imbargosining xitayda kishilik hoquq weziyiti yaxshilanmighiche bikar qilinmaydighanliqini bildürdi.

Yawropa ittipaqi 1989 - yili tyen'enmin oqughuchilar herikiti qoralliq basturulghandin kéyin, xitaygha qoral - yaraq imbargosi qoyghan. Lékin fransiye, portugaliye qatarliq bezi döletler imbargoni bikar qilishni teshebbus qilmaqta. Yawropa ittipaqining re'isi xoséy manuyil barroso jüme küni tokyoda, yawropa ittipaqidiki döletlerning bu mesilide munazire élip barmighanliqini bildürdi.

Roytérs axbarat agéntliqining eskertishiche, barroso " biz qudret tapqan jonggoning dunyagha riqabetchi bolidighan dölet süpitide emes, belki ijabiy amil süpitidiki dölet bolushi kérek yaki zörür, dep qaraymiz," deydu.

Barrosoning eskertishiche, xitayning kishilik hoquq ehwali, qanunning roli we dimokratiyide ilgirlesh bolmighiche imbargoni yawropa puqralirining kallisidin chiqiriwetkili bolmaydiken. U, " biz ulargha bezi ilgirleshler bolmighiche we yawropa puqralirining qarishida yéngi hawa yaritilmighiche imbargoni bikar qiliwétish mümkinchiliki bar emes, dep éyttuq," didi. Xoséy manuyil barroso yaponiyini ziyaret qilmaqta. U, jüme küni yaponiye bash ministiri koyzumi bilen söhbet élip bardi.

Yaponiye yawropa ittipaqining xitaygha qoyghan imbargosini bikar qiliwétishke qarshi turiwatqan döletlerning biri. Amérika, eger yawropa ittipaqi imbargoni bikar qilsa, yawropa ittipaqigha qarshi öch élish tedbiri qollinidighanliqini agahlandurmaqta. (Erkin)