Xitay yawropa birlikidin qoral imbargosini bikar qilishni telep qildi

Xitay charshenbe küni yawropa birlikidin 17 yildin buyan yolgha qoyulup kéliwatqan qoral imbargosini bikar qilishni telep qildi.

Xitay tashqi ishlar ministirliqi emeldari li rüyyü muxbirlarni kütiwélish yighinida, "biz yawropa birlikining wedisi boyiche qoral imbargosini bikar qilidighan siyasiy qararini tézraq chiqirishini ümid qilimiz. Chünki bu xitay-yawropa ittipaqi munasiwetlirining téximu yaxshilinishigha paydiliqtur" dédi.

Li xitay bash ministiri wén jyabawning asiya-yawropa aliy yighinida bu mesilini otturigha qoyidighan yaki qoymaydighanliqigha biwaste jawap bérishtin özini tartti. Wén kéler hepte asiya-yawropa aliy yighinigha qatnishish üchün finlandiyige baridighan bolup, u bu qétimliq yawropa sepiride yene, gérmaniye we en'gliyilerni ziyaret qilmaqchi. Analizchilar wén jyabawning yawropa sepiride xitaygha qaritilghan qoral imbargosini bikar qilish mesiliside alahide toxtilidighanliqini perez qilishmaqta.

Xitay hökümiti 1989‏-yili tiyen'enméndiki oqughuchilarning tinch yoldiki pa'aliyitini qanliq basturghandin kéyin, amérika we yawropa ittipaqi xitaygha 15 yilliq qoral sétip bermeslik imbargosi qoyghan idi. Gerche 15 yil toshqan bolsimu, lékin xitayning kishilik hoquq weziyitining yenila nachar bolushi seweblik bu imbargo bikar qilinmay keldi. (Peride)