Italiye yawropa ittipaqining xitaygha qoyghan qoral- yaraq imbargosini bikar qilish terepdari

• 
  2006-09-18

Italiye bash ministiri romano prodi düshenbe küni béyjingda 6 künlük xitay ziyaritini axirlashturushtin burun, yawropa ittipaqining xitaygha qoyghan qoral - yaraq imbargosini tézrek bikar qilishqa chaqirdi.

"Italiye, xitaygha qoral - yaraq sétishni chekleydighan imbargoni bikar qilishqa heydekchilik qilidu, " dep tekitligen romano prodi, "biz bu mesilini mumkin qeder tézrek hel qilishimiz kérek, " deydu. U bu sözlerni 1989 - yili xitay dimokratiye herikiti basturulghan jay tyen'enmin meydanining gherb teripididiki xelq sariyida sözlidi.

Yawropa ittipaqi tyen'enmin oqughuchilar herikitining basturulushini eyiblesh üchün 1989 - yili xitaygha imbargo qoyghan. Prodi bu sepiride xitay bash ministiri wén jyabaw bilen iqtisadi - soda mesililirige chétilidighan 15 türlük kélishim imzalidi. Wén jaybaw ötken hepte xélsinkida yawropa ittipaqi rehberlirini qoral - yaraq imbargosini bikar qilishqa chaqirghan bolsimu, lékin yawropa ittipaqi imbargoni derhal bikar qilishqa wede bermigen.

Prodi wén jaybaw bilen kishilik hoquq mesilisi üstide "ijabi muzakire" élip barghanliqini bildürdi. U, "italiye xelqi uchur, axbarat we étiqat erkinlikini qoghdashqa alahide köngül bölidu, " deydu. Xitay hökümiti yéqinda chet'el metbu'atlirining pa'aliyitige cheklime qoyudighan yéngi belgilime chiqarghan idi. (Erkin)