Кишилик һоқуқ тәшкилатлири бирләшкән дөләтләр тәшкилатиниң кишилик һоқуқ кеңишини әйиблиди


2007.05.08

Дүшәнбә күни, икки чоң кишилик һоқуқни көзитиш тәшкилати, бирләшкән дөләтләр тәшкилати кишилик һоқуқ кеңиши кишилик һоқуқ дәпсәндичиликини кәскин рәвиштә тәнқид қилалмиди дәп әйиблиди.

Бирләшкән дөләтләр тәшкилатиниң һазир вәзипә өтәватқан мәзкур кеңиши, алдинқи нөвәттики кишилик һоқуқ комитети лаяқәтсиз болуп қалғандин кийин орниға дәсситилгән болуп, баш штаби җәнвәгә җайлашқан бирләшкән дөләтләр тәшкилатиниң көзәтчиси, бу кеңәшниң тунҗи йилини "адәмни бәк үмидсизләндүриду" дәп сүпәтлиди.

Кишилик һоқуқ көзәтчиси вә нюйоркта паалийәт елип бериватқан әркинлик өйи бирликтә үч парчә доклат елан қилип, кишилик һоқуқни еғир дәпсәндә қилип келиватқан хитай, куба, сәуди әрәбистани қатарлиқ дөләтләр өзини қоғдап қалди вә бу дөләтләр судан, зимбабуви қатарлиқ дөләтләрни әйиблиништин тосуп қалди дәп көрсәткән.

Мәлум болушичә, бирләшкән дөләтләр тәшкилати кишилик һоқуқ кеңишиниң пәқәт кишилик һоқуқ мәсилисигә қарита дуня җамаәтчиликиниң диққити қозғаштин башқа һоқуқи йоқ болуп, мәзкур тәшкилатниң көпинчә әзалири хитайниң йенини алидиған африқа вә башқа мусулман дөләтләр икән.

Бирләшкән дөләтләр тәшкилатиниң 53 дөләттин тәркип тапқан кишилик һоқуқ комитети кишилик һоқуқни еғир дәпсәндә қиливатқан дөләтләрни әйиблимәй өткүзивәткәнлики үчүн инавитини йоқатқан вә бултур бу комитетниң орниға бирләшкән дөләтләр тәшкилатиниң кишилик һоқуқ кеңиши дәсситилгән. (Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.