Kishilik hoquq teshkilatliri birleshken döletler teshkilatining kishilik hoquq kéngishini eyiblidi

Düshenbe küni, ikki chong kishilik hoquqni közitish teshkilati, birleshken döletler teshkilati kishilik hoquq kéngishi kishilik hoquq depsendichilikini keskin rewishte tenqid qilalmidi dep eyiblidi.

Birleshken döletler teshkilatining hazir wezipe ötewatqan mezkur kéngishi, aldinqi nöwettiki kishilik hoquq komitéti layaqetsiz bolup qalghandin kiyin ornigha dessitilgen bolup, bash shtabi jenwege jaylashqan birleshken döletler teshkilatining közetchisi, bu kéngeshning tunji yilini "ademni bek ümidsizlendüridu" dep süpetlidi.

Kishilik hoquq közetchisi we nyuyorkta pa'aliyet élip bériwatqan erkinlik öyi birlikte üch parche doklat élan qilip, kishilik hoquqni éghir depsende qilip kéliwatqan xitay, kuba, se'udi erebistani qatarliq döletler özini qoghdap qaldi we bu döletler sudan, zimbabuwi qatarliq döletlerni eyiblinishtin tosup qaldi dep körsetken.

Melum bolushiche, birleshken döletler teshkilati kishilik hoquq kéngishining peqet kishilik hoquq mesilisige qarita dunya jama'etchilikining diqqiti qozghashtin bashqa hoquqi yoq bolup, mezkur teshkilatning köpinche ezaliri xitayning yénini alidighan afriqa we bashqa musulman döletler iken.

Birleshken döletler teshkilatining 53 dölettin terkip tapqan kishilik hoquq komitéti kishilik hoquqni éghir depsende qiliwatqan döletlerni eyiblimey ötküziwetkenliki üchün inawitini yoqatqan we bultur bu komitétning ornigha birleshken döletler teshkilatining kishilik hoquq kéngishi dessitilgen. (Jüme)