Xitay, kishilik hoquq xatirisi " nacharning ichidiki eng nachar" döletler tizimlikige kirgüzüldi

Amérikidiki bir kishilik hoquq teshkilati yer shari kishilik hoquq weziyitining ehwali üstidin tekshürüsh élip bérip, kishilik hoquq xatirisi "nacharning ichidiki eng nachar" döletler tizimlikini turghuzup chiqti we xitayni bu tizimliktiki 17 döletning biri, dep élan qildi.

Erkinlik sariyi, dep atlidighan kishilik hoquq teshkilatining doklatta eskertishiche, bérma, kuba, liwiye, shimaliy koriye, la'us, xitay we se'udi erebistan qatarliq 17 dölet kishilik hoquq xatirisi "nacharning ichidiki eng nachar" döletler bolup, buning ichide shimaliy koriye, kuba we bérma qatarliq 8 döletni puqralar hoquqi we siyasi hoquqi xatirisi téximu nachar döletler, dep qaralghan.

Doklatta körsitilishiche, yuqiriqi döletlerde hökümet puqralar kündilik turmushining her qaysi saheliri türlük usullar bilen teqip qilinmaqta shundaqla musteqil teshkilatlar we siyasi öktichiler basturulmaqta yaki cheklenmekte. Bu doklat bilen yéqinqi 10 kün ichide xitay kishilik hoquq xatirisining chet'el organliri teripidin 3 - qétim eyiplinishidur.

Buningdin burun xelq'ara kechürüm teshkilati xitayni olimpik yighinidin paydilinip öktichilerni basturmaqta, dep eyibligen shundaqla amérika xelq'ara diniy erkinlik komitéti xitayning diniy erkinlik xatirisini tenqid qilidighan doklat élan qilghan idi. (Erkin)