Хитайниң интернет хәвәрлирини контрол қилиш тәдбири америкиниң тәнқидигә учриди

Хитай һөкүмити интернет учурлирини контрол қилишни күчәйтишни мәқсәт қилған йеңи бәлгилимә елан қилғандин кейин, америка ташқи ишлар министирлики баянат елан қилип, америка хәвәр әркинлики вә сөз әркинликини контрол қилишқа қаритилған һәрқандақ урунушқа җидди диққәт қилиду, дәп көрсәтти.

Хитай мәтбуатлириниң хәвәр қилишичә, хитай дөләт кабинтиниң ахбарат идариси чиқарған йеңи бәлгилимидә хәвәр понкитлири, интернет вә қол телефонида учур йоллиғучилар, "сағлам болмиған хәвәрләр" ни йоллиса, еғир җазалинидиғанлиқини агаһландурған.

Америка ташқи ишлар министирлиқиниң дүшәнбә күнки ахбарат елан қилиш йиғинида, ташқи ишлар министирлики баянатчиси меккормак мухбирниң бу һәқтики бир соалиға җаваб берип, "учур вә сөз әркинлики һәр қандақ җәмийәт үчүн интайин муһим, америка буни һәммибап өлчәм, дәп қарайду вә бу һоқуқни барчә авази билән қоллайду," деди.

Меккормакниң тәкитлишичә, америка учур вә сөз әркинликини чәкләшкә қаритилған һәр қандақ урунушқа җидди түрдә диққәт қилидикән.

Әмма хитай һөкүмити сәйшәнбә күни елан қилған баянатида америкиниң тәнқидини рәт қилди. Хитай ташқи ишлар министирликиниң баянатчиси чин гаң, "һәр бир дөләтниң ахбарат органлири шу дөләтниң қанун- бәлгилимилирини астида һәрикәт қилиду," дәп тәкитлигән. (Әркин)