Amérika intérnét shirketliri dölet mejlisi yighinigha qatnishishtin özini tartti


2006.01.30
Share on WhatsApp
Share on WhatsApp

Amérikidiki maykrosoft (Microsoft) we sisko (Cisco) gha oxshash chong intérnét shirketliri dölet mejliside échilidighan guwahliqtin ötüsh yighin'gha qatnishishtin özini qachurdi.

Bu yighin amérika dölet mejlisi kishilik hoquq komitétining orunlashturushi bilen 2‏-ayning 1‏- künige békitilgen bolup, maykrosoft we sisko shirkiti her ikkilisi bu yighin'gha wekil ewetelmeydighanliqini bildürgen. Shundaqla qalghan intérnét shirketliridin gugul (Google) bilen yaxu (Yahoo) mu bu yighin'gha qatnishish toghrisida téxi héchqandaq wede bermigen.

Gugul shirkiti ötken charshenbe küni xitay hökümitining intérnét mulazimet mezmunlirini izdeshke yardemlishish telipige qoshulghan idi. Buningdin bashqa makrosoft, sisko we yaxu qatarliq intérnét shirketlirimu xitayning bu jehettiki bezi shertlirige qoshulup kelgen. Amérika dölet mejliside échilidighan mezkur guwahliqtin ötüsh yighinigha amérikidiki bu chong intérnét shirketliridin bashqa yene, chégrasiz muxbirlarni qoghdash teshkilati, xelq'ara kechürüm teshkilati, kishilik hoquq közitish teshkilati, toronto uniwérsitéti we xarword qanun mektipi qatarliq xelq'araliq 5 hökümetsiz teshkilatmu qatnishidiken.

Shundaqla ular yighinda bu intérnét shirketliridin bu heqte su'al soraydu. Amérika dölet mejlisi kishilik hoquq komitétining re'isi tom lantosning bayanatchisi lin wéyl " bu esli ularning namini aqlashtiki bir yaxshi purset idi" deydu. Xelq'ara kechürüm teshkilatining asiya ishliri dériktori t. Kumar " bu intérnét shirketlirining amérika dölet mejlisining yighinigha qatnashmasliqi, bir nomussizliq. Ular öz nöwitide yene xitay hökümiti bilen bir yengdin qol chiqiriwatidu" dep bildürdi.

Amérika dölet mejlisi awam palatasimu 2‏-ayning 15‏-küni gugul we bashqa intérnét shirketlirini yene bir guwahliqtin ötüsh yighinigha chaqirghan. Bu, awam palata ezasi kris smisning riyasetchiligide élip bérilidiken. Uning bayanatchisi bred déyspringning bildürishiche, ular hetta bu shirketlerning xitaygha intérnét téxnikilirini sétip bérishini chekleydighan qanun layihisi chiqirishni oylashmaqta iken. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.