Amérika dölet mejlisi ezaliri Yahoo ni tenqid qildi

Amérika dölet mejlisi ezaliri peyshenbe küni amérika intérnet shirkiti Yahoo ni xitay saqchi da'irilirining intérnet yazghuchisi li jini qolgha élishigha yardem qilish bilen bilen eyiplidi.

Roytérs axbarat agéntliqining xewer qilishiche, amérika awam palatasi kishilik hoquq guruppisining re'isi, jumhuriyetchiler partiyisi awam palata ezasi kristofir simit, yazghuchi li jining qolgha élinishini " körün'gen taghning bir burjiki", dep atighan. U, téximu köp zatlarning ziyankeshlikke uchrighanliqini tépip chiqishqa toghra kélidu, deydu.

Amérika dölet mejlisi kishilik hoquq guruppisining qoshumche re'isi tam lantosning eskertishiche, amérika dölet mejlisi xitayning amérika intérnet shirketlirini özi bilen hemkarlishishqa mejburlap, söz erkinlikini basturmaqchi boliwatqanliqigha dawamliq diqqet qilidu, dep körsetti. U, " biz bu shirketlerning bésimgha taqabil turush yollirini izdewatimiz, didi.

Uning ashkarilishiche, bu mesile toghrisida amérika dölet mejlisi kéler hepte guwaliq bérish yighini chaqiridiken. Kéler hepte charshenbe küni chaqirilidighan guwaliq bérish yighinida, dölet mejlisi ezaliri Yahoo shirkitidin xitay hökümitini zadi qandaq uchurlar bilen teminligenliki, buninggha qanchilik ademning chétilidighanliqi we Yahoo ning xitay saqchi da'iriliri bilen bolghan munaswiti qatarliq mesililerni sorishi mümkin.

Chigrisiz muxbirlar teshkilati peyshenbe küni élan qilghan bayanatida eskertishiche, sichü'en ölkilik hökümetning xadimi li ji, xitayning parixorluqi heqqide maqale yazghan we Yahoo shirkiti uning heqqidiki uchurlarni xitay saqchi da'irilirigha yetküzüp bergen bolup, saqchilar ötken yili 4 - ayda Yahoo shirkiti teminligen yip uchigha asasen li jini qolgha alghan. (Erkin)