Asiya ‏- tinch okyan iqtisadiy hemkarliq yighini nurghun mesililerni muzakire qilidu

Wyétnamning paytexti xanoyda dawamlishiwatqan asiya ‏- tinch okyan rayoni iqtisadiy hemkarliq teshkilatining yuqiri derijilik emeldarlar yighinida, dunya soda teshkilatining déhqanchiliq we gheyriy déhqanchiliq mehsulatliri bazirini échiwétish mesilisi, asiya ‏- tinch okyan teshkilatining erkin mal baziri rayonini échish mesilisi hemde rayon xaraktérlik bixeterlik mesilisi qatarliq nurghun mesililer muzakire qilinmaqchi.

Amérika awazi tor bétide bayan qilinishiche, 14 ‏- qétimliq iqtisadiy hemkarliq yighinining gheyriy resmiy yighini 12 ‏- noyabir küni bashlan'ghan bolup, besh kündin kéyin bashlinidighan asiya ‏- tinch okyan iqtisadiy hemkarliq teshkilatigha eza döletler bashliqliri yighinigha amérika prézidénti bush, rusiye prézidénti putin, yaponiye bash ministiri enyi pusen hemde xitay dölet re'isi xu jintaw qatarliqlar qatnishidu we yighin ayaqlashqanda muhim bayanatlar élan qilidu.

Bu yil 7 ‏- ayda dunya soda teshkilatigha eza döletlerdin amérika, yaponiye, awstraliye, braziliye, hindistan we yawropa ittipaqi qatarliqlar dunya soda teshkilatida déhqanchiliq we gheyriy déhqanchiliq mehsulatlar bazirini échiwitish mesiliside birlikke kélelmey qatmalliqqa kirip qalghan idi.

Nöwette dawamlishiwatqan shimaliy koriyining yadro qoralliri mesilisimu yighin'gha qatnashqan bir qisim dölet rehberliri otturigha qoyidighan muhim mesililerning biri dep qaralmaqta. (Méhriban)