Irandiki saylam netijiside maxmud exmedi nijat prézidéntliqqa saylandi

Xewerlerge qarighanda irandiki prézidént saylimi axirqi netijige ériship, téhran shehirining bashliqi maxmud exmedi nijatning iranning prézidéntliqigha saylan'ghanliqi élan qilindi.

2003-Yilidin étibaren téhran shehirining bashliqliq wezipisini ötewatqan maxmut exmedi nijatning xelq ichidiki tesiri anche yuqiri we keng bolmisimu, biraq uning tesir küchi zor hésablinidighan konsiriwatiplar guruhining qollishigha ériship, ularning keng xelqni awaz bérishke qozghishidek ewzellikke sazawer bolghanliqi körsitilmekte.

Exmedi nijatning iran prézidéntliqigha saylinishi xelqara jemiyetning bolupmu gherb döletlirining diqqitini qozghighan bolup, buningdiki seweb uning gherb bilen bolghan munasiwetke mötidil mu'amile qilishni teshebbus qiliwatqan siyasiy guruhlargha qarshi bolghan konsiriwatiplar éqimigha mensup bolushi iken.

Bu munasiwet bilen en'giliye tashqi ishlar weziri bayanat élan qilip, özlirining bu saylamgha bolghan gumani we endishisini bildürgen hemde iran hökümitidin yéngi tashqi siyasiy köz qarishini sherhiyleshni telep qilghan .

Amérika tashqi ishlar minisitirliqi irandiki saylamgha bolghan gumanini bildürgen bolsimu, emma amérikining iran'gha tutqan pozitsiyiside özgirish bolmaydighanliqini eskertken.

Yawropa ittipaqi bolsa, iran hökümiti bilen insan hoquqini yaxshilash, atom énérgiyisi we bashqa saheler boyiche ortaq ish élip bérishni ilgiri süridighanliqini bildürgen.

Yéngi prézidént maxmut exmedi nijat öz bayanatida "her bir döletlerning öz aldigha musteqil tereqqiy qilish yoli barliqi , shunga iranning amérika bilen munasiwet ornutushining zörüriyiti yoqliqi"ni shuningdek iranning atom énérgiyisi pilanining özgermeydighanliqini bildürgen. (Ümidwar)