B d t yadro énérgiye idarisi iran yadro mesiliside söhbetleshmekchi

Birleshken döletler teshkilatining yadro énérgiye közitish idarisi bolghan "xelq'ara atom énérgiye idarisi" charshenbe küni iranning yadro kirizisi mesiliside yépiq söhbet élip bardi.

35 Dölet wekilliridin terkip tapqan mezkur idare, yawropa ittipaqining chaqiriqi astida bu söhbetni oyushturghan bolup, ular iranni qandaq qilip yadro programmisini eslige keltürüsh qararini toxtitishqa köndürüsh mesiliside muzakirileshmekte.

Bu arida iran da'iriliri xelq'araning qarshiliqigha qarimastin, charshenbe küni xelq'ara atom énérgiye idarisi péchetlep qoyghan yadro eslihelerni qayta qozghatqan. Atom énérgiye idarisi gerche bir qarargha kélip bolalmighan bolsimu, lékin ular iranning yadro eslihelerni qayta qozghutush qilmishini birleshken döletler teshkilati bixeterlik kéngishige sunushi mumkin. Chünki bu orun jaza qoyush hoquqigha ige.

Iran da'iriliri isfaxandiki yadro énérgiye zawutining uran ayrish xizmitini eslige keltürüsh qararini düshenbe küni jakarlighan bolup, buninggha xelq'ara jama'iti qarshi turdi. Gerche iran özlirining yadro programmisining peqet yadro éléktir istansisigha oxshash tinch yoldiki sahelerge ishlitilidighanliqini bildürgen bolsimu, emma xelq'ara jama'iti bolupmu amérika we yawropa ittipaqi, iranning yadro programmisini, yadro qorallirini tereqqiy qildurushqa ishlitishi mumkinlikidin endishe qilip keldi. (Peride)