Xelq'ara atom énérgiye idarisi iran yadro mesiliside qarar maqullidi

35 Dölettin teshkil tapqan xelq'ara atom énérgiye idarisi iranning yadro mesilisini birleshken döletler teshkilati bixeterlik kéngishige sunush éhtimalliqi toghrisida bir parche qarar maqullidi. Bu qarar 22 awazning qollishi we bir awazning qarshi chiqishi bilen maqulluqtin ötti. Qalghan 12 dölet bolsa, awaz bérish hoquqidin waz kechti.

Mezkur qararda, iranning yadro bixeterlik qoghdash belgilimilirige xilapliq qilghanliqi körsitilgen bolsimu, emma ular iran yadro mesilisini b d t bixeterlik kéngishige hazirla tapshurushni pilanlimighan.

Xelq'ara atom énérgiye idarisining bayanatchisining bildürishiche, mezkur idare 11 -ayda yene bir qétim bu heqte yighin ötküzidighan bolup, buningdin burun iran mesilisini b d t bixeterlik kéngishige sunmay turidiken.

Iran wekili bu bélet tashlashta hemmisining birdek pikirge kélip bolalmasliqining, amérika bilen en'gliye üchün bir meghlubiyet ikenlikini éytti. Emma amérika hökümiti bu qararni tebriklep, mezkur bélet tashlash netijisining "aldigha qarap bésilghan bir chong qedem" ikenlikini bildürdi.

Shundaqla en'gliye we fransiye qatarliq döletlermu, atom énérgiye idarisigha eza köp qisim döletlerning bu qararni qollighanliqini tebriklidi. (Peride)