ئامېرىكا پۈتۈن دۆلەتلەرنى ئىران بىلەن يادرو ھەمكارلىقىنى توختىتىشقا چاقىردى


2005.10.03
Share on WhatsApp
Share on WhatsApp

ئامېرىكا ھۆكۈمىتى، دۈشەنبە كۈنى دۇنيادىكى پۈتۈن دۆلەتلەردىن ئىران بىلەن يادرو ھەمكارلىقىنى توختىتىشنى تەلەپ قىلدى. ئامېرىكا ھۆكۈمىتى بۇ تەلەپنى خەلقئارا ئاتوم ئېنېرگىيىسى ئىدارىسىنىڭ ئىراننىڭ يادرو پروگراممىسى ھەققىدە ئېلان قىلغان قارارىدىن كېيىن ئوتتۇرىغا قويدى.

خەلقئارا ئاتوم ئېنېرگىيىسى ئىدارىسى -24 سېنتەبىر كۈنى ئىراننىڭ يادرو قوراللارنى تارقىلىشىنىڭ ئالدىنى ئېلىش كېلىشىمىگە ھۆرمەت قىلمىغانلىقىنى ئىنىقلىغانلىقىنى بىلدۈرگەن ئىدى.

سىياسىي ئانالىزچىلار، خەلقئارا ئاتوم ئېنېرگىيىسى ئىدارىسىنىڭ مەزكۇر قارارىنى، ئىراننىڭ ئاتوم مەسىلىسىنى بىرلەشكەن دۆلەتلەر تەشكىلاتى بىخەتەرلىك كېڭىشىگە ئېلىپ كېلىشنىڭ تۇنجى قەدىمى دەپ قارىماقتا.

ئىراننىڭ ئىتتىپاقدىشى بولغان رۇسىيە، ئۆتكەن ئاي خەلقئارا ئاتوم ئېنېرگىيىسى ئىدارىسىنىڭ ئىراننىڭ ئاتوم مەسىلىسى توغرىسىدىكى قارارىغا ئاۋاز قوشۇشتىن ئۆزىنى قاچۇرغان ئىدى. خەۋەرلەرگە قارىغاندا، ئامېرىكا ھۆكۈمىتى، ئىران بىلەن بولغان يادرو ھەمكارلىقىنى توختىتىشى ئۈچۈن رۇسىيە ھۆكۈمىتىگە بېسىم ئىشلەتمەكتە.

ئامېرىكا ھۆكۈمىتى ئىراننى يادرو قورال ياساشقا تىرىشىۋاتىدۇ دەپ، ئەيىبلىمەكتە. ئەمما ئىران ئامېرىكىنىڭ بۇ ئەيىبلەشلىرىنى رەت قىلىپ، ئۆزىنىڭ يادرو ئېنېرگىيىسى تېخنىكىسىغا ئىگە بولۇش ھوقۇقىغا ئىگە ئىكەنلىكىنى تەكىتلىمەكتە.

بۇ ئارىدا، ئىران ھۆكۈمىتى دۈشەنبە كۈنى، بايانات ئېلان قىلىپ، ئەگەر ئامېرىكا ئىراننىڭ يادرو پروگراممىسى مەسىلىسىدە بېسىمىنى داۋاملاشتۇرىۋەرسە، ئامېرىكىنىڭ مەنپەتلىرىنى زىيانغا ئۇچرىتىش ئۈچۈن پۈتۈن كۈچىنى ئىشقا سالىدىغانلىقىنى بىلدۈردى. (قانات)

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.