Amérika pütün döletlerni iran bilen yadro hemkarliqini toxtitishqa chaqirdi

Amérika hökümiti, düshenbe küni dunyadiki pütün döletlerdin iran bilen yadro hemkarliqini toxtitishni telep qildi. Amérika hökümiti bu telepni xelq'ara atom énérgiyisi idarisining iranning yadro programmisi heqqide élan qilghan qararidin kéyin otturigha qoydi.

Xelq'ara atom énérgiyisi idarisi -24 séntebir küni iranning yadro qorallarni tarqilishining aldini élish kélishimige hörmet qilmighanliqini iniqlighanliqini bildürgen idi.

Siyasiy analizchilar, xelq'ara atom énérgiyisi idarisining mezkur qararini, iranning atom mesilisini birleshken döletler teshkilati bixeterlik kéngishige élip kélishning tunji qedimi dep qarimaqta.

Iranning ittipaqdishi bolghan rusiye, ötken ay xelq'ara atom énérgiyisi idarisining iranning atom mesilisi toghrisidiki qararigha awaz qoshushtin özini qachurghan idi. Xewerlerge qarighanda, amérika hökümiti, iran bilen bolghan yadro hemkarliqini toxtitishi üchün rusiye hökümitige bésim ishletmekte.

Amérika hökümiti iranni yadro qoral yasashqa tirishiwatidu dep, eyiblimekte. Emma iran amérikining bu eyibleshlirini ret qilip, özining yadro énérgiyisi téxnikisigha ige bolush hoquqigha ige ikenlikini tekitlimekte.

Bu arida, iran hökümiti düshenbe küni, bayanat élan qilip, eger amérika iranning yadro programmisi mesiliside bésimini dawamlashturiwerse, amérikining menpetlirini ziyan'gha uchritish üchün pütün küchini ishqa salidighanliqini bildürdi. (Qanat)