Amérika, en'gliye we fransiye iranning söhbet teklipini ret qildi

Amérika, en'gliye we fransiye iranning yawropa ittipaqi bilen bolghan yadro mesilisidiki söhbetni eslige keltürüsh teklipini ret qildi. Buning bilen iran yadro mesilisini birleshken döletler teshkilatining bixeterlik kéngishige sunush tirishchanliqliri téximu kücheymekte.

Iranning bir aliy emeldari seyshenbe küni en'gliye, fransiye we gérmaniye tashqi ishlar ministirigha xet sunup, söhbetni eslige keltürüsh arzusini ipadiligen idi. Lékin xette, ularning yawropa ittipaqi bilen bolghan yadro pilanini tonglitish kélishimige boysunidighan yaki sunmaydighanliqi tilgha élinmighan.

Amérikining xelq'ara yadro énérgiye idarisidiki wekili " ishinimizki xelq'ara yadro énérgiye idarisi kéler ayda iranning yadro mesilisini b d t bixeterlik kéngishige sunidu" dep bildürdi. Emma iran tashqi ishlar ministiri bu xil éhtimalliqning kichiklikini eskertti.

Iran da'iriliri bu ayning bashliri xelq'aradiki qarshiliqlargha qarimastin, 2 yil dawamlashqan yadro tetqiqatini toxtitish weziyitige xatime bérip, yadro tetqiqatini eslige keltürgen idi. Shundaqla téhran da'iriliri bu yadro pilanining peqet tinch meqsette élip bérilidighanliqini tekitlep keldi. (Peride)