Iran gherb döletlirini yene söhbetke dewet qildi

Iran hökümiti yadro mesiliside bir tereptin gherb döletlirining tehditliridin qorqmaydighanliqini jakarlisa, yene bir tereptin gherb döletlirini mesilisini bir terep qilish üchün söhbetke chaqirmaqta.

Iran tashqi ishlar ministiri menochir mutteqi 23 ‏- yanwar küni tihranda muxbirlargha bergen bayanatida, biz yawrupaliq dostlirimizni söhbet üstilige qaytip kélishke chaqirimiz, dédi.

Lékin, iranning yadro mesilisidiki bash muzakirichisi eli larijani, en'giliyining " maliye waqti " gézitige bergen bayanatida, iran gherb döletlirining tehditliridin qorqmaydu, eger gherb döletliri iranning yadro mesilisini b d t bixeterlik kéngishige élip barsimu, iran uranyum tawlash pa'aliyitini dawamlashturiwiridu, dédi.

Gérmaniye, fransiye we en'giliye, iran uranyum tawlash pa'aliyitini qaytidin tonglatmighiche, iran bilen söhbet ötküzüshni ret qilmaqta. Amérika bolsa, iran yadro mesilisining b d t bixeterlik kéngishige élip bérilishi kéreklikini bildürmekte.

Iranning ikki yildin buyan tonglitip qoyghan uranyum tawlash ishini qaytidin bashlishi bilen birlikte, gherb döletliri bilen iran munasiwetlirining keskinlishishi, dunyada néfit bahasining künséri örlishige seweb boluwatidu. (Qanat)