Iran rusiyining yadro mesilisidiki teklipini qarshi aldi

Iran da'iriliri, rusiyning yadro mesiliside otturigha qoyghan teklipige qarita aktip pozitsiyisini ipadilidi. En'giliye b b s radi'o - téléwiziye shirkitining 25 ‏- yanwar küni bergen xewirige qarighanda, rosiyide söhbette boliwatqan iranning yuqiri derijilik hökümet xadimi ali larijani, gerche yadro mesilisidiki bu söhbette héchqandaq kélishim tüzülmigen bolsimu, lékin féwral éyida bu mesile üstide yenimu ilgirligen halda muzakire élip baridighanliqini bildürdi.

Biraq ali larijanining agahlandurushiche, eger kéler hepte échilidighan xelq'ara atom énirgiyisi yighinida , iranning yadro mesilisi birleshken döletler teshkilati bixeterlik kéngishige tapshurulsa , u halda iran choqum téximu zor kölemde oraniyum tawlash xizmitini élip baridiken.

Birleshken döletler teshkilatining bixeterlik kéngishige eza döletler bu heqtiki meydanini alliqachan otturigha qoyghan bolup, bu döletler gérmaniyining qatnishishi bilen 3 ‏- féwral küni londonda iran'gha qandaq tedbir qollinish mesilisi üstide mexsus yighin ötküzmekchi.

Gherb döletliri, iranning qayta oraniyum tawlash herikitige küchlük naraziliqini bildürmekte. Emma iran mezkür herikitini tinchliq üchün élip bériwatqan tedbir dep körsitip, yadro programmisini dawamlashturidighanliqini bildürmekte. (Peride)