Б д т хәвпсизлик кеңишидики дөләтләр иран ядро кризиси мәсилисидә бирликкә кәлди


2006.01.31

Хитай, русийә, әнгилийә, германийә, америка вә явропа иттипақи ташқий ишлар министирлири лондонда иран ядро мәсилиси бойичә сөһбәт елип берип, иран ядро мәсилисини б д т хәвпсизлик кеңишиниң бир тәрәп қилишиға тапшуруш тоғрисида пикир бирликигә кәлди. Бирақ хәвпсизлик кеңиши иранға һәрикәт қоллиништин бурун, хәлқара атом ениргийә идариси бу йил 3 - айда хәвпсизлик кеңишигә тапшуридиған иран һәққидики доклатини күтиду вә кейинки қәдимини шуниңға көрә басиду.

Бирләшмә ахбарат агентлиқиниң хәвәр қилишичә, бу хәвписзлик кеңишидики бәш даимий әзаниң тунҗи қетим иран ядро мәсилисини хәвпсизлик кеңишиниң бир тәрәп қилишиға тапшуруш тоғрисида пикир бирликигә келиши болуп һесаблинидикән. Буниң алдида америка, әнгилийә вә франсийә қатарлиқ дөләтләр иран ядро мәсилисини хәвпсизлик кеңишидә бир тәрәп қилишни тәләп қилип кәлгән. Әмма русийә билән хитай бу мәсилисини хәвпсизлик кеңишигә елип беришини қоллимиған иди.

Иран ядро мәсилисини хәвпсизлик кеңишидә бир тәрәп қилишқа қарши туруп, бундақ қилишниң қануни асаси йоқ, дәп қаримақта. Иранниң муавин президенти ғуламриза ағазадә, " ғәрб билән болған әң чоң мәсилә уларниң иранни хәвпсизлик кеңишигә йоллашта һечқандақ бир қануни асас көрситип берәлмигәнликтә " дәйду.

Хитай ташқий ишлар министири ли җавшиң сәйшәнбә күни иран ташқий ишлар министири мутәққи билән көрүшкәндин кейин, иранниң ядро ениргийисидин тинч мәқсәдләр үчүн пайдилиниш һоқуқиға һөрмәт қилиниши керәк. Шуниң билән биргә иранниң үстигә алған мәҗбурийитини ада қилишиға тоғра келиду, деди. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.